Вардар – Нант

Европскиот ракометен првак Вардар продолжува со победничката серија во лигата на шампионите и сезонава, откако на првиот домашен натпревар од група А триумфираше со 27-23 (14-10) против Нант. За Вардар ова е втор триумф сезонава, седми по ред во лигата на шампионите.

Новиот клупски рекорд во лигата на шампионите за Вардар е токму оваа седма победа по ред. На претходниот натпревар во Полска ја постигнавме шестата победа по ред што исто така беше рекордно, а сега само ја подигнавме летвичката за едно ниво погоре.

Резултатот покажува дека Вардар победи, но до двата бодови имаше голема борба, многу вложен труд и енергија. Кога беше најпотребно покажавме дека имаме концентрација, сила, знаење и моќ од секоја ситуација да излеземе како победници.
Во 53 минута Нант намали на 24-23 најавувајќи дека ќе направат сѐ за пресврт. Но, до пресврт не дојде, бидејќи Вардар одигра пред сѐ одлично во одбрана.

Стоилов зголеми на 25-23, а потоа Дибиров изнуди пробивање во напад на Нант. Дојде нова шанса да поведеме со „плус 3″, но ударов на Иван Чупиќ од пенал заврши во стативата. Претходните четири пенали ги реализираше без проблем. Бековите На Вардар немаа многу шанса за играње, пред сѐ поради агресивната и на моменти груба игра на противникот. Но, бомбардерот Вуко Борозан токму кога требаше погоди, па во 58 минута Вардар зголеми на 26-23. Се чинеше дека сѐ е решено. Не дозволивме Нант да се понадева повторно. Освоивме топка пред нашиот гол, а потоа во последната минута Дибиров собра еден „отпадок” и ги врати оние „плус четири” од полувремето за триумф од 27-23.

На почетокот на второто полувреме имавме предност од 19-14 (38 минута). Тогаш дојде мал наш лош период во играта, бидејќи ривалот со серија од 0-4 намали на 19-18. Тоа беше првиот знак дека Нант нема да се откажи. Но, Вардар повторно одигра одлично и „избега” на 23-19 во 47 минута.

Поради повреда на грбот и на овој натпревар паузираше голманот Страхиња Милиќ, а ден пред мечот се повреди и Игор Карачиќ.

Француската екипа уште од самиот почеток покажа зошто неодамна го освои домашниот Супер куп и тоа против богатиот ПСЖ, и го победи ПИК Сегед во првото коло на ЛШ. Одбраната на Французите играше одлично, па малку од нашите топки успеваа да завршат до Стојанче Стоилов, а многу удари по телото и рацете добија и Даинис Криштопанс и Вуко Борозан. Агресивната игра беше знак дека можеби ќе има малку голови на средбата. Во 15 минута имаше постигнато вкупно 8 гола на мечот, а во 20-тата минута вкупно 12. Се внимаваше на секој потег на противничкиот напаѓач, и тоа носеше малку голови.

Тренерот Раул Гонзалез ја бараше седморката што ќе може да одговори на вака агресивните Французи, истовремено да играат и во двата правца, одбрана – напад. На нашето водство од 5-3 гостите одговорија со израмнување 6-6 во 18 минута, а потоа и поведоа со 6-7 преку Гурбиндо. Тоа веќе беше знак дека треба нешто да се менува во нашата игра, а Раул Гонзалез побара тајм аут. Од тој момент до крајот на полувремето на теренот царуваа вардарци.

Прво брзо израмнивме, а потоа и поведовме. Одбраната беше одлична, нападот разновиден и пред се снаодлив. Бразилецот Рожерио Мораеш можеше да издржи и по двајца противнички ракометари на грб, и притоа да постигне гол. Даде пет гола од седум обиди и беше наш најефикасен играч во овој дел од натпреварот.

Рожерио ја урна противничката одбрана, а вардарци беа концентрирани и внимателни на секој противнички потеб, за крадење на топки, и ефикасни контри и полуконтри.

Она што ќе поминеше низ рацете на нашите одбранбени играчи, заврши во рацете или нозете на Арпад Штербик. Дури и пеналот на Кире Лазаров во 24 минута го одбрани, фаќајќи ја топката „жива” со нозете. Нашиот голман имаше седум успешни интервенции и плус еден пенал. Мечот го заврши со вкупно 10 одбрани и два пенали.

Во следното коло Вардар го пречекува ППД Загреб во Скопје.