Вардар – Динамо

Вардар броеше до 42 за нов триумф во СЕХА…

Вардар ја оствари и 13 победа по ред во СЕХА Газпром лигата, славејќи со 42-32 (20-17) против фенерџијата Динамо Панчево и поставувајќи нов клупски рекорд. „Црвено-црните” остануваат единствен тим во регионалното натпреварување со максимален учинок по седум одиграни натпревари.

На овој натпревар игравме без неколку стандардни играчи, како Абутовиќ, Штербик, Борозан и Циндриќ. Нивното отсуство не се одрази зашто Вардар беше фаворит а ова требаше да биде само загревање за претстојниот меч во сабота од лигата на шампионите против Рајн Некар. Долга е клупата на Вардар, и од самиот почеток шанса за играње доби Владо Недановски, а потоа и Јања Војводиќ.

Не памети Вардар кога последен пат примил 17 голови во првото полувреме, па уште од аутсајдер како Динамо Панчево. Иако бевме фаворити гостите играа без притисок знаејќи дека нема што да загубат, па затоа и од самиот почеток покажаа дека ќе сторат сѐ за да се покажат во одлично светло, па дури и ако може да освојат бодови. Имаа и водство 2-4, и неколкупати предност од еден гол покажувајќи дека аутсајдерите никогаш не треба да се потценуваат. Сепак разликата беше очигледна и прашање на време беше само кога резултатот ќе се „сврти” и ќе биде во корист на „црвено-црните”.

Гостите во 18 минута останаа без еден играч откако Петар Зујовиќ направи груб прекршок над Јања Војводиќ. Зујовиќ доби црвен картон, а Вардар при таа акција постигна гола, а во следниот напад уште еден за водство 11-9. Во 21 минута имавме и „плус 3″ за водство 13-10 како најава за превземање на иницијативата, темпото на игра и резултатската предност. Разликата полека се правеше, но Динамо на секоја наша грешка возвраќање со гол одржувајќи неизвесност, онолку колку што можеше. На крајот од првото полувреме имавме предност од „плус 3″ за водство 20-17.

Гостите се „држеа” до средината на второто полувреме кога Вардар првпат направи предност од седум голови (30-23). Тоа беше период од средбата кога беше скршен отпорот на гостите, а Вардар најави дека нема да има неизвесност. Во 51 минута првпат имавме и осум гола предност, 35-27, а потоа и 36-27. Единствено неизвесно беше со колква разлика ќе заврши средбата. „Десетката” ја раситнивме во 54 минута за прво двоцифрено водство, 38-28. Сѐ беше решено, но требаше рутински да се доиграат преостанатите минути.

Поголема минутажа на мечот, и особено во второт полувреме за играње добија Владо Недановски, Мартин Поповски, Јања Војводиќ, па и Даниел Ѓорѓевски кои вообичаено поретко влегуваат во игра, па и во тимот од 16 играчи.

ВАРДАР – Динамо 42-32

ВАРДАР: Милиќ, Ѓорѓески Стоилов, Недановски 4, Поповски 4, Криштопанс 4, Мораеш 3, Македа 3, Карачиќ 2, Кањелас 6, Чупиќ 6, Дибиров, Шишкарев, Војводиќ 3, Марсениќ 7.

Во следното коло на СЕХА лигата Вардар гостува на 28 ноември во Нашице кај Нексе.